215_7143_01.MP4.Still003

სასკოლო სპორტული ოლიმპიადის გამარჯვებული მინი-ფეხბურთში N4 სკოლის გუნდია

  სასკოლო სპორტული ოლიმპიადის მუნიციპალური თამაშების ფარგლებში შეჯიბრი  მინი-ფეხბურთში გაიმართა. შეხვედრას ტყიბულის სპორტის სასახლემ უმასპინძლა. მასში ჩართული იყო  ქალაქის - N1, N2, N4, N6, N7 და  სოფლების: საწირის, ორპირის, გურნის,  კურსებისა და გელათის  საჯარო სკოლების, 2004-05-06წ.წ. დაბადებულ მოსწავლეებისაგან დაკომპლექტებული, ათი გუნდი. თითოეულს თან ახლდა ერთი მწრთვნელ- მასწავლებელი. სულ ცხრა შეხვედრა გაიმართა, თითოეული 10-10 წუთიანი ტაიმითა და 5 წუთიანი შესვენებით. მეტად საინტერესო და დაძაბული ფინალის შედეგად გამარჯვებული N4 საჯარო სკოლის გუნდი გახდა, ხოლო მეორე საპრიზო ადგილი N1, მესამე კი, - საწირის სკოლის, გუნდებმა მოიპოვეს.

  სასკოლო სპორტული ოლიმპიადის მუნიციპალურ შეხვედრებს ტყიბულში ორგანიზებას უწევს მერიის განათლების, კულტურის, სპორტის, ახალგაზრდობისა და ტურიზმის განვითარების სამსახური. საშეჯიბრო გეგმა-გრაფიკის მომზადებას, მსაჯების ტექნიკური პერსონალის შერჩევასა და თამაშების საჭირო სპორტული ინვენტარით აღჭურვას სპორტული ცენტრი და საფეხბურთო კლუბი ,,მეშახტე'' უზრუნველყოფს.

  ოლიმპიადის ფარგლებში გარდა მინი-ფეხბურთისა უკვე ჩატარდა შეჯიბრი გეზრბენში. შემდეგი ასპარეზობები კი,- ფრენბურთში, მაგიდის ჩოგბურთში, ხელბურთში, კალათბურთში, ბადმინტონსა და მხიარულ სტარტებში გაიმართება. ყველა  სახეობის გამარჯვებული მონაწილეობას მიიღებს ოლიმპიადის რეგიონალურ თამაშებში, ხოლო აღნიშნული ეტაპის გამოვლენილები რეგიონის სახელით გაემგზავრებიან ფინალურ შეხვედრებზე.

მარი ბაბუხადია