46 მედალოსანი საჯაროდ დააჯილდოვეს

  ტყიბულის მუნიციპალიტეტში 2018-2019 და 2019-2020 სასწავლო წლების წარჩინებულ კურსდამთავრებულთა დაჯილდოება გაიმართა. ახალგაზრდებს სწავლის წარმატებით დასრულება მიულოცეს, კვლავ წარმატებები უსურვეს და შესაბამის სერტიფიკატებთან ერთად ოქროსა და ვერცხლის მედლები გადასცეს ტყიბულის მუნიციპალიტეტის მერმა, დავით ჩერქეზიშვილმა, საკრებულოს თავმჯდომარემ, ნატალია კობახიძემ, ქალაქ ტყიბულის საგანმანათლებლო რესურსცენტრის ხელმძღვანელმა, ირინ კორძაიამ.

  სპეციალური სიგელებით, ასევე, დაჯილდოვდნენ სკოლის დირექტორები. მედალოსან კურსდამთავრებულებს, მუნიციპალიტეტის მერის ინიციატივით ,,ბიბლუსის“ სასაჩუქრე ბარათები გადაეცათ.

  ,,ჩემო მეგობრებო, მინდა მოგილოცოთ პირველი მნიშვნელოვანი წარმატება თქვენს ცხოვრებაში. თქვენ დღეს ჯილდოვდებით ოქროსა და ვერცხლის მედლებით, ეს არის ფრიად სიმბოლური, მაგრამ ამის მიღმა გაცილებით ღირებული ჯილდოა, რომელიც მომავალი განვითარებისათვის უზარმაზარ საფუძველს გაძლევთ. მინდა მივულოცო მშობლებს თქვენი წარმატება და შევუერთდე მათ სიხარულს. მათთან ერთად კი - თქვენი სკოლის პედაგოგებსა და ხელმძღვანელებს... თქვენ უკვე ისეთი საფუძველი გაქვთ ჩაყრილი თქვენივე მომავლის განვითარებისათვის, რომლის შენელებაც არავითარ შემთხვევაში არ შეიძლება. მინდა გავიხსენო ცნობილი გამონათქვამი: განათლება ეს ის შესაძლებლობაა, რომელიც აძლევს შანსს მეშახტის შვილს, გახდეს პროფესორი, ფერმერის შვილს - გახდეს პრეზიდენტი.., განათლება ყველა ეტაპზე უმნიშვნელოვანესი ფაქტორია ადამიანის განვითარებისათვის. ამავე დროს, მხოლოდ თეორიული ცოდნა არ ნიშნავს, მეგობრებო, განათლებას, არამედ უნარებისა და ჩვევების განვითარებას, შინაგანი ზნე-ჩვეულებების დახვეწასაც მოიცავს. როცა ამ ყველაფერს ის მაღალი ღირებულებაც ემატება, რასაც შენი მიწა-წყლის სიყვარული ჰქვია, მაშინ ერთი ასად იქნება დაფასებული თქვენი საქმიანობა. შესაბამისად, ძალიან მნიშვნელოვანია დღევანდელი დღე იმ ნაწილშიც, რომ ეს არის სტიმული, რათა თქვენ მუდამ გახსოვდეთ - შრომას, მონდომებას და მიზანსწრაფვას ყოველთვის მოაქვს შედეგი. გისურვებთ, რომ თქვენი ნებისმიერი გადადგმული ნაბიჯი მოიცავდეს არა მარტივი გზების ძიებას, არამედ, იყოს გაჯერებული შრომისა და თავდადების შედეგებით. სწორედ ასეთი გზით მიღებული შედეგები იქნება კიდევ და კიდევ თქვენი ახალი წარმატებების საწინდარი და მნიშვნელოვანი მოტივატორიც,“- მიმართა დავით ჩერქეზიშვილმა ახალგაზრდებს.

  ტყიბულის მუნიციპალიტეტში 2018-2019 და 2019-2020 სასწავლო წელებში გამოვლინდა 46 მედალოსანი, მათგან 37 - ოქროს და 9 - ვერცხლის კანდიდატი.

 

 

 

 

 

 

 

 

 

19 thoughts on “46 მედალოსანი საჯაროდ დააჯილდოვეს

Добавить комментарий

Ваш адрес email не будет опубликован.