„ცხრაჯვარის“ გზის რეაბილიტაცია მიმდინარეობს

  ტყიბულის მუნიციპალიტეტში „ცხრაჯვარის“ სალოცავთან მისასვლელი საავტომობილო გზის რეაბილიტაცია მიმდინარეობს, რომლის ღირებულება, საპროექტო–სახარჯთაღრიცხვო დოკუმენტაციის შესაბამისად, 2 მლნ ლარია.

  საქართველოს მთავრობის განკარგულების შესაბამისად პროექტის განხორციელებას რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი უზრუნველჰყოფს.

  გზის მოწესრიგების თხოვნით ფონდს ტყიბულის მუნიციპალიტეტმა მიმართა. პროექტით გათვალისწინებულია „ცხრაჯვარის“ სალოცავთან მისასვლელი 3,6 კმ საავტომობილო გზის რეაბილიტაცია, რომლის ფარგლებში დაგეგმილია ორფენიანი ასფალტის საფარისა და გარეგანათების მოწყობა, საავტომობილო გზის გასწვრივ ლითონის მილების ჩალაგება, რკინა–ბეტონის კიუვეტებისა და კედლების მშენებლობა.

 აქ მიმდინარე და დასრულებულ სამუშაოებს ტყიბულის მუნიციპალიტეტის მერი, თემურ ჩუბინიძე, ადგილზე გაეცნო და შემსრულებელი კომპანიის წარმომადგენლებსა და დასაქმებულებს გაესაუბრა.

  ,,ცხრაჯვარი" საქართველოში ცნობილი ტურისტული ლოკაციაა და ის ზღვის დონიდან 1500 მეტრზე მდებარეობს.

  პროექტის განხორციელების შემდეგ ადგილობრივი მოსახლეობისთვის, მომლოცველებისა და ტურისტებისათვის გადაადგილება უსაფრთხო გახდება.

 

 

კომენტარები გამორთულია