პრემიერა ,,შერეკილები“ ტყიბულის თეატრში

27.07.202227.07.2022

ტყიბულს ინტეგრირებული თეატრი, ,,აზდაკის ბაღი,“ რეზო გაბრიაძის პიესის მიხედვით შექმნილი სპექტაკლის, ,,შერეკილების,“ პრემიერით ეწვია.

ინსცენირების ავტორმა და რეჟისორმა ,,აზდაკის ბაღის“ სამხატვრო ხელმძღვანელმა, ივანე ( ბაჩო) გაბრუაშვილმა, ელდარ შენგელაიას რეჟისურით შექმნილი ყველასათვის საყვარელი ფილმისგან სრულიად განსხვავებული ახლებური ხედვით გადაწყვეტილი, კლოუნადას ჟანრის, დადგმა წარმოგვიდგინა. მასში, შეზღუდული შესაძლებლობის მქონე მოყვარულ მსახიობებთან ერთად, პროფესიონალი, ცნობილი სახეები და ამასთანავე, მარიონეტი შშმ თოჯინებიც თამაშობენ.

ჩვენი ქალაქის სტუმარმა თეატრმა ,,შერეკილები“ ერთი წლის წინ გადრაცვლილი დიდი რეჟისორისა და დრამატურგის, რეზო გაბრიაძის, საპატივცემულოდ დადგა და როგორც რეჟისორმა აღნიშნა, შემთხვევით არ მომხდარა, რომ პრემიერის გასამართ ადგილად პიესის ავტორის ფესვების გათვალისწინებით სწორედ, რომ ტყიბული შეარჩია.

სპექტაკლი განსხვავებული და საინტერესოა იმითაც, რომ მოხსნილი აქვს ენობრივი ბარიერი და ის ამ თვალსაზრისით ერთნაირად გასაგებია განვითარების ყველა ტიპისა და ეროვნების მაყურებლისთვის.

საქართველოში პირველი ინტეგრირებული თეატრი ,,აზდაკის ბაღი“ რვა წლის წინ, ივანე გაბრუაშვისლ მიერ დაარსდა და ის, იმ დღიდან დაწყებული უწყვეტად დგამს წარმოდგენებს. პანდემიის პერიოდში კი, სატელევიზიო სპექტაკლი ,,უჩვეულო გაკვეთილი“ აჩუქა მან მაყერებელს. მნიშვნელოვანია, რომ თეატრთან თანაარსებობს ამავე სახელწოდების ინტეგრირებული თეატრ-სტუდია და სოციალური საწარმოც, სადაც შექმნილი საპილოტე ვერსიის შშმ თოჯინები სწორედ ,,შერეკილებში“ ვნახეთ.

,,ამ ქალაქიდან დადებითი ემოციებით მივდივართ. მადლობა ტყიბულს, მუნიციპალიტეტის მერიას, თეატრს, არაჩვეულებრივ მაყურებელს, ბედნიერი ვარ და მიხარია, რომ ასეთი ტიპის თეატრი მაქვს და მით უფრო იმით, რომ მას ასე შესანიშნავად იღებს მაყურებელი“ - აღნიშნა ჩვენთან საუბარში რეჟისორმა-ივანე გაბრუაშვილმა.

წარმოდგენა ტყიბულის თეატრში მუნიციპალიტეტის მერიისა და კულტურის ობიექტების გაერთიანების მხარდაჭერით გაიმართა, რომელსაც მერი, დავით ჩერქეზიშვილი, საკრებულოს თავმჯდომარე, იოსებ რობაქიძე, ადგილობრივი თვითმმართველობის, კულტურის სფეროებისა და სხვა ორგანიზაციათა წარმომადგენლები, შშმ პირები და სხვა სტუმრები ესწრებოდნენ.

მარი ბაბუხადია