N6 საჯარო სკოლაში წმინდანად შერაცხული მეფის, დავით IV აღმაშენებლის, ხსენების დღისადმი მიძღვნილი ისტორიული თხზულების წერის კონკურსი გაიმართა. მასში მონაწილეობდა მუნიციპალიტეტის როგორც ქალაქის, ისე - სოფლების საჯარო სკოლების IX, X, XI, XII კლასებიდან შერჩეული 27 მოსწავლე.

საკონკურსო თემების ჩამონათვალი იყო: „დავითი რეფორმატორი“; „დავითი მთავარსარდალი“; „ძლევაი საკვირველი - დიდგორის ბრძოლა“; „გასწიე იგი ნიკოფსიიდან დარუბანდამდე“; ,,დავითი მწიგნობარი“.

კონკურსის ხანგრძლივობა 3 საათით განისაზღვრებოდა. მონაწილეებს კი, -  შტრიხკოდიანი სამუშაო ფურცლები დაურიგდათ. ნაშრომები სპეციალური ჟიურის მიერ იქნა შეფასებული, რომელთა შემადგენლობაში ისტორიისა და ასევე, ქართული ენისა და ლიტერატურის მასწავლებლები იყვნენ. გამარჯვებულები გამოვლინდნენ:

I ადგილი - ანა გოგიაშვილი - (N6 საჯარო სკოლა, X კლასი)

II ადგილი - ქრისტინე მიქიაშვილი - (N5 საჯარო სკოლა, XII კლასი)

III ადგილი - სოფიო ჩაფიძე - (N5 საჯარო სკოლა, XII კლასი),
ანა გვეტაძე - (N6 საჯარო სკოლა, XI კლასი).

გამარჯვებულ მოსწავლეთა ნამუშევრების პრეზენტაცია გელათის მონასტრის აკადემიის დარბაზში მოეწყობა, აქვე გაიმართება მათი ფულადი პრიზებით დაჯილდოებაც.

კონკურსი მიზნად ისახავდა: დავით აღმაშენებლის, როგორც უძლიერესი ქართველი მონარქის პატივგებას; წმინდა მეფის ეპოქის მიმართ განსაკუთრებული დამოკიდებულების, ისტორიული მემკვიდრეობის თაობიდან თაობაზე გადაცემის ტენდენციის შენარჩუნებას; ისტორიული, კულტურული და ეროვნული ფასეულობების მნიშვნელობის გააზრებას; ქართული ტრადიციებისა და პატრიოტული სულისკვეთების ამაღლებას; თხზულების წერის კულტურის შენარჩუნებას, თავისუფალი აზროვნების ჩამოყალიბებასა და არგუმენტირების უნარების განვითარების ხელშეწყობას მოსწავლე-ახალგაზრდობაში.

ღონისძიება მერიის განათლების, კულტურის, სპორტის, ახალგაზრდობისა და ტურიზმის განვითარების სამსახურის ორგანიზებით, ადგილობრივი თვითმმართველობისა და საგანმანათლებლო რესურსცენტრის მხარდაჭერით გაიმართა.

მარი ბაბუხადია