მიკრო და მცირე მეწარმეობის ხელშეწყობის მიზნით, პროგრამის, „აწარმოე საქართველოში“ ფარგლებში, ბიზნესიდეების კონკურსის ახალი ეტაპი იწყება. 15 მაისიდან 31 მაისის ჩათვლით მოხდება განაცხადების მიღება ვებგვერდზე www.qartuli.ge.

  საუკეთესო ავტორების გამოვლენის შემდეგ გამარჯვებულებს ჩაუტარდებათ ტრენინგი მეწარმეობის შესახებ, რომელიც მოიცავს ბიზნესგეგმის მომზადების საკითხებს. მომდევნო ეტაპზე, კონკურსის შედეგად მოხდება გადარჩევა გამორჩეული ბიზნესგეგმებისა და ისინი მიიღებენ პროგრამით გათვალისწინებულ თანადაფინანსებას შემდეგი სქემით: ერთ მეწარმე სუბიექტზე 5 000 ლარის ოდენობით, ორ მეწარმეზე - 10 000 ლარი და სამზე - 15 000 ლარი, სადაც მეწარმის თანამონაწილეობა - 20%-ია.

  აღნიშნული გრანტის მისაღებად დაინტერესებული პირებისათვის საინფორმაციო შეხვედრა ტყიბულში, გამგეობის სააქტო დარბაზში, სააგენტოს, „აწარმოე საქართველოში,“ მეწარმეობის განვითარების დეპარტამენტის უფროსმა, ოთარ განთიამ გამართა, რომელიც კონტრაქტორი ორგანიზაციის, „საქართველოს სკაუტური მოძრაობის ორგანიზაცია - საქართველოს სკაუტების,“ წარმომადგენლებთან ერთად ეწვია ჩვენს ქალაქს.

  პროგრამაში მონაწილეობა შეუძლია ნებისმიერ სრულწლოვან (18 წელს მიღწეულ) საქართველოს მოქალაქეს, რომელსაც არ გააჩნია მიმდინარე ვადაგადაცილებული საგადასახადო ვალდებულება სახელმწიფოს წინაშე. კონკურსში გამარჯვების შემთხვევაში კი, იგი საჭიროა დარეგისტრირდეს გადასახადის გადამხდელ ფიზიკურ პირად (ინდ. მეწარმედ).

  საგრანტო პროგრამა ითვალისწინებს პირობას, რომლის მიხედვით ფინანსური შედეგი პროექტის განხორციელებამ უნდა დადოს მაქსიმუმ ერთ წელიწადში.

ნათია მურუსიძე