„ოკრიბა“ საგაზაფხულო კონცერტით

21.05.202221.05.2022

ერთგულ მაყურებელსა და მოწვეულ სტუმრებს ქორეოგრაფიულმა ანსამბლმა „ოკრიბამ,“ ტრადიციისამებრ, საგაზაფხულო შემოქმედებითი ზეიმი მოუწყო.
ტყიბულის სახალხო, ქორეოგრაფიული ანსამბლის კონცერტი მუნიციპალურ თეატრში გაიმართა.
ორსაათიანი პროგრამა დატვირთული იყო, როგორც მრავალფეროვანი ქორეოგრაფიული, ისე, მუსიკალური და ვოკალური ნომრებით. შემოქმედებით საღამოში, მოცეკვავეებთან ერთად, ჩართულნი იყვნენ ტყიბულელებისათვის საყვარელი ადგილობრივი შემსრულებლები: ლოლიტა კორძაძე და ემზარ გაბუნია, ხათუნა გაბელაშვილი, ნათია გოქაძე, ხატია გოგელაშვილი, გიორგი გობეჯიშვილი, ნიკოლოზ დონაძე, სპარტაკ ჭელიშვილი.
„ოკრიბამ“ მაყურებელს წარმოუდგინა ქორეოგრაფიული ნომრები: „ქალთა ხევსურული,“ „ოსური,“ „აჭარული პოპური“ (გოგმანი), „განდაგანა,“ „სვანური,“ „მთიელ ქალ-ვაჟთა შეჯიბრი,“ „ილოური-ლეკური,“ „რაჭული,“ „რაჭული - ზეიმი შაორის ტბაზე.“ აღსანიშნავია, რომ განსაკუთრებული მოწონება და აღფრთოვანება საგანგებოდ ამ დღისთვის დადგმულმა ცეკვამ „ქართველი კავკასიელები,“ (კავკასიური) გამოიწვია.
ნომრები ანსამბლის სამხატვრო ხელმძღვანელებთან, გულჩე და ჯემალ ბოცვაძეებთან ერთად, ახალგაზრდა ქორეოგრაფ-პედაგოგმა, თამარ ყვავაძემ და მოცეკვავე-რეპეტიტორმა, გიორგი გელაძემ მოამზადეს. ღონისძიებაში, ასევე, ჩართული იყო საწირის საჯარო სკოლასთან არსებული ქორეოგრაფიული ჯგუფი - „ოკრიბა 2“.
ღონისძიების მსვლელობისას მუნიციპალიტეტის მერმა, დავით ჩერქეზიშვილმა, საქართველოს დამსახურებულ ქორეოგრაფ-პედაგოგს, გულჩე ბოცვაძეს, მრავალრიცხოვანი მაყურებლის თანდასწრებით, სცენაზე მიულოცა საქართველოს ქორეოგრაფთა კავშირის მიერ მინიჭებული მნიშვნელოვანი აღიარება - საქართველოს ქორეოგრაფიის ამაგდარის წოდება და ორდენი. მერმა, საკრებულოს თავმჯდომარესთან, იოსებ რობაქიძესთან, ერთად, ქალბატონი გულჩე და ანსამბლის ახალგაზრდა ქორეოგრაფ-პედაგოგი, თამარ ყვავაძე, სადღესასწაულო თაიგულებით დააჯილდოვა და მათ წარმატებული შემოქმედებითი მოღვაწეობა უსურვა. ქორეოგრაფ-პედაგოგებს, ასევე, „კულტურის ობიექტების გაერთიანების“ დირექტორის მოვალეობის შემსრულებელმა, ნათია ხეთერელმა, მიღებული ჯილდოები მიულოცა და მოწყობილი ზეიმისათვის მათ მადლობა გადაუხადა.
საგაზაფხულო ღონისძიება ტყიბულის თეატრალური დასის მსახიობს, ნათია ხაბურზანიას, მიჰყავდა, რომელიც დადებითი ემოციების, მაყურებელთა ოვაციებისა და აპლოდისმენტების ფონზე მრავალჟამიერით დასრულდა.
„ოკრიბა“ ჩვენი ქალაქის კოლორიტი წყვილის, გულჩე და ჯემალ ბოცვაძეების, ხელმძღვანელობით ჩვეული შრომისმოყვარეობით, აგრძელებს შემოქმედებით ,,ფუსფუსს" მაყურებელთან შემდეგი შეხვედრისათვის.