კურსდამთავრებულთა ნახატებისა და ფოტოების გამოფენა

   ტყიბულის მუნიციპალიტეტის სამხატვრო სკოლაში კურსდამთავრებულთა ნამუშევრების გამოფენა მოეწყო.   წარმოდგენილი იყო 100-მდე ფერწერული, გრაფიკული, გამოყენებითი ხელოვნების - ვიტრაჟში, თექასა და ბატიკაში შესრულებული ნამუშევრები. ასევე, ქანდაკება - ბარელიეფების სახით. 14-მა აღსაზრდელმა, ოთხწლიანი სწავლების შედეგად, სხვადასხვა ჟანრში გამოხატული ხედვა და ფანტაზია, ინდივიდუალობა და ნიჭი ექსპოზიციით უჩვენა დამთვალიერებელს. თითოეულ ავტორს საკუთარ მრავალფეროვან ნაშრომებში ზეთსა და ტილოში შესრულებული ნიმუშებიც ჰქონდა გამოფენილი. ყურადღებას იქცევდა ვიტრაჟის დამზადების დახვეწილი ტექნიკა. ასევე, გრაფიკაში ტუშით ხატვისა და გრიზაილის გამოყენება. შედგა ქვიშაზე ხატვის ცოცხალი პროცესიც.

პარალელურად ამ დღეს ფოტოგამოფენის კუთხეც განახლდა. კურსდამთავრებულებმა ზურაბ ჩუბინიძემ და ბექა დიხამინჯიამ ჩვენი ქალაქის არქიტექტურული თუ კულტურული ნაგებობების ფოტოობიექტივით აღბეჭდილი ხედები წარმოადგინეს. სტუმრებმა, რომელთა შორის მუნიციპალიტეტის მერის მოადგილე, სოფიო ბოჭორიშვილი და ადგილობრივი თვითმმართველობის სხვა წარმომადგენლები იყვნენ, 14-ვე მოსწავლეს, სამხატვრო სკოლის დამთავრებასთან დაკავშირებით, მოწმობები საზეიმო გარემოში გადასცეს და წარმატებული მომავალი უსურვეს მათ. აღსანიშნავია, რომ თითოეულ მათგანს, ნახატებთან ერთად, ხელოვნების ისტორიაში სადიპლომო ნაშრომი ჰქონდა მომზადებული. როგორც სამხატვრო სკოლის დირექტორმა, მირზა ჭელიშვილმა, ჩვენთან საუბრისას აღნიშნა, ცოტა ხნის წინ განახლებული, სამხატვრო გალერეა მორიგ გამოფენას თავის სივრცეში უმასპინძლებს.

ნათია მურუსიძე

35486462_1164318527043516_319772207951642624_n 35486566_1164330220375680_2190706356325974016_n 35518030_1164330173709018_7793138340919771136_n 35522812_1164323907042978_5013815036028649472_n 35534031_1164327017042667_9114262636127584256_n 35544048_1164326937042675_6494529106091180032_n 35728626_1164323937042975_8179577877348483072_n

Добавить комментарий

Ваш адрес email не будет опубликован.