53735656_127724121642770_3993946958212366336_n

ტყიბულელი მოკრივე საერთაშორისო ტურნირის პრიზიორია

  ქუთაისში გაიმართულ გარდაცვლილ მოკრივეთა ხსოვნისადმი მიძღვნილ ტურნირზე კრივში, 2005-06 წლებში დაბადებულთა შორის, 72 კგ. წონით კატეგორიაში მონაწილე ტყიბულელმა მოკრივემ, N5 საჯარო სკოლის VIII კლასის მოსწავლემ, სპორტული ცენტრის აღსაზრდელმა, მამია ობოლაძემ (მწვრთნელი: გია დვალი), წარმატებით იასპარეზა და II საპრიზო ადგილი დაიკავა. მან მხოლოდ ფინალური ორთაბრძოლა დათმო და შესაბამისად ვერცხლის მედალი და საპატიო თასი მოიპოვა. აღნიშნულ ტურნირში საქართველოს ყველა რეგიონის 70-მდე მოკრივესთან ერთად სომხეთის წარმომადგენლებიც ასპარეზობდნენ.

  აღსანიშნავია, რომ მამია ობოლაძე საერთაშორისო ტურნირების მრავალგზის გამარჯვებული და პრიზიორია. ის კრივში 6 წელია, საქართველოს ეროვნული კატეგორიის მსაჯთან, სპორტის ოსტატთან, გია დვალთან, ვარჯიშობს. ამჟამად, მამია საქართველოს ჩემპიონატისათვის ემზადება, რომელიც 3 აპრილს, ზესტაფონში, გაიმართება. წარმატებული სპორტსმენი ამ საპასუხისმგებლო შეჯიბრებისათვის, მწვრთნელთან ერთად ყოველდღიურად გაძლიერებულად მეცადინეობს.