ტყიბულის სპორტის სასახლეში მუნიციპალიტეტის სპორტული ცენტრის თასის პირველობა გაიმართა კუნგ-ფუში. მასში 80-მდე სპორტსმენი მონაწილეობდა, მათ შორის, ვაჟებთან ერთად - გოგონებიც. სტუმრებს ზესტაფონის, ბაღდათის, ხარაგაულისა და აბაშის კუნგ-ფუს სკოლებიდან მეტოქეობა ტყიბულის კუნგ-ფუსა და კარატეს სკოლებმა გაუწიეს.

  ტურნირის საზეიმოდ გახსნა საჩვენებელი ნომრების წარდგენით მოხდა. შეჯიბრი კი კუნგ-ფუს სამ სახეობაში - ფაიტინგში, დადზენსა და ტუი შოუში, გაიმართა. ასპარეზობა საინტერესოდ და დაძაბულად მიმდინარეობდა. შვიდ გუნდს შორის I ადგილისა და ტყიბულის მუნიციპალიტეტის თასის მფლობელი ტყიბულის კუნგ-ფუს სკოლა (ხელმძღვანელი - ოლეგ ფანჩულიძე) გახდა. სამივე სახეობაში მათ 16 პირველი ადგილი მოიპოვეს.

  ჩემპიონები და პრიზიორები გახდნენ: დავით ჩეთოშვილო, ნიკოლოზ ბუბაშვილი, საბა აბესაძე, ალექსი მაჭავარიანი, გიორგი ფოფხაძე, გიორგი ტალახაძე, ანდრო ბოჭორიშვილი, გიორგი გოგილიძე, მიხეილ ვერულაშვილი, ოთარ სანიკიანი, ბარბარე აბესაძე, ქეთო ხავთასი, ლუკა მესხორაძე. აღსანიშნავია, რომ დავით ჩეთოშვილმა, საბა აბესაძემ და გიორგი ფოფხაძემ ფაიტინგის ორ სხვადასხვა წონით კატეგორიაში იასპარეზეს და შედეგად,  გაიმარჯვეს კიდეც.

  რაც შეეხება ტყიბულის კარატეს სკოლას (ხელმძღვანელი - ლევან კუბლაშვილი), მანაც წარმატებული შეჯიბრი გამართა და გუნდური III ადგილი დაიკავა, რაც 7 საჩემპიონო ადგილის მიღების შედეგად მოხდა. გამარჯვება მოიპოვეს - ირაკლი აკოფოვმა, ლაზარე ცქიფურიშვილმა, ნიკოლოზ ჩაკვეტაძემ, გიორგი ქათამაძემ, ნიკოლოზ ბოჭორიშვილმა, ლუკა მუჯირმა და მათე ცნობილაძემ.

  ტურნირს ორგანიზება და მასპინძლობა ტყიბულის სპორტულმა ცენტრმა და კუნგ-ფუს სკოლამ ერთობლივად გაუწიეს.

ნათია მურუსიძე