meshaxte

ტყიბულში მეშახტის პროფესიული დღე მოკრძალებულად აღინიშნა

   ტყიბულში მეშახტის პროფესიული დღე ტრადიციულად ყოველ წელს, აგვისტოს ბოლოს, აღინიშნება. ჩვენს ქალაქში შახტში მომხდარი ტრაგიკული მოვლენებიდან გამომდინარე ეს დღე, მერიის განათლების, კულტურის, სპორტის, ახალგაზრდობისა და ტურიზმის განვითარების სამსახურის ორგანიზებით, ამჯერად, მასშტაბური და საზეიმო ღონისძიებების გარეშე, მოკრძალებულად, აღინიშნა.

    ტყიბულის წმ. გიორგის სახელობის ეკლესიაში ტაძრის წინამღძვარმა, დეკანოზმა მამა იოანე (კობახიძემ), შახტში დაღუპულების სულთა მოსახსენიებლად პანაშვიდი გადაიხადა. მას მრევლთან ერთად, მუნიციპალიტეტის მერი, თემურ ჩუბინიძე, საკრებულოს თავმჯდომარე, ნატალია კობახიძე, ადგილობრივი თვითმმართველობის, „საქნახშირის“ ადმინისტრაციის, სხვადასხვა სამსახურისა და ორგანიზაციის წარმომადგენლები, მეშახტეები და მოქალაქეები ესწრებოდნენ.

     ამ დღესთან დაკავშირებით მხარეთმცოდნეობის მუზეუმში მოეწყო ექსკურსია, სადაც დამთვალიერებლებს საშუალება ჰქონდათ გაცნობოდნენ საგანგებოდ მეშახტის პროფესიულ დღესთან დაკავშირებით წარმოდგენილ შესაბამის ექსპონატებს.

    საგამოფენო დარბაზში შეკრებილი საზოგადოების დაინტერესებას იწვევდა თვალსაჩინოდ გამოფენილი მრავალფეროვანი ფოტომასალა, როგორც ჩვენი ქალაქის, ისე ქვანახშირის მრეწველობის განვითარებას უკავშირდებოდა. აქ მოწყობილი ფოტო-სტენდები ასახავდა ძველი ტყიბულის ხედებს, ქალაქის აღმშენებლობას, ქვანახშირის მოპოვებას, შახტების მშენებლობას და სხვ. ასევე, წარმოდგენილი იყო დამსახურებული მეშახტეების, იმ ცნობილი ადამიანებისა და საზოგადო მოღვაწეთა ფოტოები, რომელთაც ღვაწლი მოუძღვით ტყიბულში სასარგებლო წიაღისეულის აღმოჩენასა და სამთო მრეწველობის განვითარებაში. გარდა ამისა, ყურადღებას იპყრობდა მეშახტის პროფესიასთან დაკავშირებული ძველი შრომის იარაღები, ნივთები თუ აღჭურვილობა, ქვანახშირისაგან მიღებული სხვადახვა ნაწარმის ნიმუშები, საინტერესო დოკუმენტები და ლიტერატურული მასალა.

  როგორც ვიცით, ძველად ტყიბული გაუვალ, დაბურულ ტყის გულში მდებარე პატარა სოფელი იყო. ცნობილია, რომ აქ ქვანახშირი 1825 წელს აღმოაჩინეს, მისი ექსპლუატაცია კი 1846 წლიდან  დაიწყო. მას შემდეგ მეშახტის საამაყო, გმირული პროფესია თაობიდან თაობას გადაეცემა. მნიშვნელოვანია, რომ სწორედ  საუკუნენახევრის წინ აღმოჩენილმა წიაღისეულმა მისცა დასაბამი ტყიბულის დაარსებას და ის რესპუბლიკური მნიშვნელობის ძლიერ სამრეწველო ქალაქად გადააქცია.

  მხარეთმცოდნეობის მუზეუმის წარმომადგენელმა, ისტორიკოსმა, გიორგი წერეთელმა, დამთვალიერებელს ტყიბულის, როგორც ქალაქის, დაარსებისა და აქ ქვანახშირის საბადოს აღმოჩენიდან მოყოლებული დღემდე სამთო მრეწველობის განვითარების ისტორიის ეტაპები გააცნო.  მუზეუმში ღონისძიების ჩატარებისათვის სათანადო პირობების შექმნა კულტურის ობიექტების გაერთიანებამ უზრუნველყო.

  მაშახტის პროფესიულ დღესთან დაკავშირებით მუნიციპალიტეტის მერმა, თემურ ჩუბინიძემ და საკრებულოს თავმჯდომარემ, ნატალია კობახიძემ, ქალაქის შემოსასვლელში მდებარე მეშახტეთა შრომის დიდების მემორიალი ყვავილებით შეამკეს.

მარი ბაბუხადია