01

,,მე რომ თოვლის ბაბუა ვიყო, ტყიბულელ ახალგაზრდებს ვაჩუქებდი"....

  ტყიბულის შოთა რუსთაველის სახელობის მოსწავლე-ახალგაზრდობის სასახლეში, 28 დეკემბერს, დამდეგი 2019 წლის აღსანიშნავად კაფე-საღამო მოეწყო, რომელშიც ჩვენი სასახლის ახალგაზრდული თვითმმართველობის 75-მდე მოსწავლე იყო ჩართული. ასეთი ღონისძიება სასახლეში ტრადიციად დამკვიდრდა და იგი უკვე მეხუთედ, წელს ჩატარდა, რომელსაც სათავეში ჩაუდგა მოსწავლეთა თვითმმართველობის დარბაზი (ხელმძღვანელი ბელა გვენეტაძე).

  საზეიმო საღამოში მონაწილეობდნენ შემოქმედთა, პრესისა და ინფორმაციის, სპორტისა და ტურიზმის, ეკოლოგიის, ბავშვთა უფლებების დაცვის, ,,პოზიტივი ტყიბულს" სექციური ჯგუფები. თითოეული გუნდი 15-მდე წევრისაგან შედგებოდა. ნიჭიერმა, კრეატიულმა ახალგაზრდებმა დამსწრე საზოგადოებას თავიანთი შესაძლებლობები აჩვენეს. მათ იმ პროექტების მიმდინარეობასა და შედეგებზეც ისაუბრეს, რომელიც მოსწავლეთა სასახლის მხარდაჭერითა და თანადგომით განახორციელეს. მოსწავლეებმა მაყურებელს სადღესასწაულო განწყობის შესაქმნელად იუმორისტული ნომრები შესთავაზეს. ასევე, მათ წარმოაჩინეს როგორც ხალხური და თანამედროვე ცეკვებისა და სიმღერების, ასევე - პოეზიის ნიმუშები. ისინი ერთმანეთს ეჯიბრებოდნენ ლექსებში, სიმღერასა თუ ცეკვაში და მთელი მონდომებით გვიჩვენებდნენ თავიანთ ხელოვნებას. სიმღერას ლექსი ცვლიდა, ლექსს - ცეკვა და იუმორი და ასე გრძელდებოდა გვიანობამდე. სახალისო იყო სალათების კონკურსიც, რომელშიც ვაჟები მონაწილეობდნენ. მოეწყო მუსიკალური ვიქტორინა და კარაოკე-შოუ-ფესტივალი.

  კაფე-საღამოზე საგანგებოდ გაწყობილ თითოეულ მაგიდას არჩეული ჰყავდა სუფრის თამადა,რომელიც ორიგინალური და შთამბეჭდავი სადღეგრძელოებით იწონებდა თავს მაყურებლის წინაშე.

  ღონისძიების მოწვეულ სტუმართა შორის იმყოფებოდნენ მუნიციპალიტეტის მერი თემურ ჩუბინიძე, მერის პირველი მოადგილე გიორგი ლომთაძე, მერიის კულტურის, განათლების, სპორტისა და ახალგაზრდობის საქმეთა სამსახურის, ტყიბულისა და თერჯოლის გაერთიანებული ოლქის მაჟორიტარ დეპუტატის ბიუროს, კულტურის ობიექტების გაეთიანების წარმომადგენლები.

  მოსწავლე-ახალგაზრდობის სასახლის ადმინისტრაციამ ღონისძიების მონაწილეები ფასიანი საჩუქრებითა და საახალწლო სუვენირებით დააჯილდოვა.

  ღონისძიებამ არაერთი ნიჭიერი და შემოქმედი ბავშვი გამოავლინა და ნათლად დაგვანახა, რომ მოზარდების სულსა და გულს საოცრად სჭირდებათ ისეთი კუთხე, სადაც ერთად დაისვენებენ, გაერთობიან, მუსიკას მოისმენენ, საკუთარ თავთან განმარტოვდებიან ყოველგვარი წინასწარი ზედმეტი მომზადების გარეშე.

  საზეიმო საღამომ დიდი ინტერესი გამოიწვია და მაყურებელთა აღტაცებულმა შეძახილებმა გვამცნო, რომ მისია-სადღესასწაულო განწყობის შექმნა, მოტივაციის ამაღლება, მეტყველებისა და შემოქმედებითი უნარების განვითარება-შესრულებული იყო.

ანი გოგიაშვილი,

მოსწავლე-ახალგაზრდობის სასახლის პრესისა და ინფორმაციის

სექციური ჯგუფის ხელმძღვანელი

48376176_380507005827192_2913051226230751232_o 48417322_380506462493913_5527313758206033920_o 49013975_380507199160506_4552854204946841600_o 49069727_380507739160452_1973039565543309312_o 49085612_380506725827220_8963430651776729088_o 49206361_380506995827193_4485426628603674624_o 49551521_380508195827073_4762130609613045760_o 49569677_380506915827201_2264794765520273408_o 49731928_380508019160424_4023408711581040640_o