ა.(ა).ი.პ. „ტყიბულის მუნიციპალიტეტის კულტურის ობიექტების გაერთიანების“ ინიციატივით, მაყვალა ქასრაშვილის სახელობის ხელოვნების სკოლაში, უკრაინულ-ფოლკლორული ანსამბლის, „კრინიცას,“ შემოქმედებითი საღამო გაიმართა. ვოკალური ანსამბლი, რომელსაც ოცდახუთწლიანი ისტორია აქვს, პირველად ესტუმრა საქართველოს და ჩვენს პატარა ქალაქს. ხალხმრავალი კოლექტივის ქართული საგასტროლო ტურნე ექვსკაციანი შემადგენლობით შემოიფარგლა, რომელმაც, ნაციონალურ სამოსში, ჩვენს მსმენელს, უკრაინული და ბელორუსიული ხალხური შემოქმედების ნიმუშების პარალელურად, ქართული ფოლკლორის რამდენიმე „მარგალიტიც“ შესთავაზა. ტყიბულელი აუდიტორია ემოციითა და აღფრთოვანებით შეხვდა მრავალხმიან, პოლიფონიურ ჟღერადობას, რომელთან ერთად წარმოდგენილი იყო უკრაინული რომანსებიც.
კონცერტის მსვლელობისას ხელოვნების სკოლის ხალხური განყოფილების მოსწავლეებმა, საკრავების თანხლებით, სტუმრებს ქართული ფოლკლორული მელოდიებიც გააცვნეს. გარდა ამისა, სკოლის ქორეოგრაფიული კლასის მოყვარულმა მოცეკვავეებმა, ამერიკელმა ქენდრამ და ზაქმა, ქართული ცეკვების პოპური წარმოადგინეს, რასაც დარბაზი მძაფრი ემოციური აპლოდისმენტებით შეხვდა. საღამოს დასასრულს კი, სტუმრებს ქორეოგრაფიული ანსამბლი „ოკრიბა“ საკონცერტო ნომრით მიესალმა.
აღსანიშნავია, რომ უკრაინულ-ფოლკლორული ანსამბლის შემოქმედებით საღამოს ორგანიზება კულტურის ობიექტების გაერთიანების პროდიუსერმა, გიორგი კუბლაშვილმა, გაუწია.