215_4436_01.MP4.Still002

საბავშვო სპექტაკლის პრემიერა მოსწავლეთა სასახლეში

  კულტურის ობიექტების გაერთიანების შოთა რუსთაველის სახელობის მოსწავლე-ახალგაზრდობის სასახლემ მაყურებელს სპექტაკლის, „ია ია მინდვრის დედოფალი,“ პრემიერა წარმოუდგინა. მისი სცენარი და დადგმის რეჟისურა საბავშვო თეატრის „ზღაპრის სამყაროს“ ხელმძღვანელს, ნუგზარ დათიაშვილს, ეკუთვნის. წარმოდგენაში გამოყენებული იყო მისივე ავტორობით შექმნილი ლექსები და სიმღერები.

    სასცენო ფერადი დეკორაციების ფონზე პერსონაჟებმა: ყვავილებმა, მზემ, მთვარემ, ციცინათელებმა, ქარმა თუ სხვებმა მაყურებელს პოზიტიური საგაზაფხულო განწყობა შეუქმნეს.

  პიესის მთავარი გმირი მინდვრის დედოფალი, სილამაზითა და სინაზით გამორჩეული გაზაფხულის ლურჯთვალა ყვავილი - ია იაა. სპექტაკლი ყველაზე უფრო ღირებულ გრძნობებზე, - მეგობრობასა და სიყვარულზეა აგებული.

  ღონისძიებაში საბავშვო თეატრის დასის ყველა წევრი აქტიურად იყო ჩართული. მათ სასახლის კედლებში შეძენილი ცოდნა და უნარ-ჩვევები პლასტიკით, მეტყველებით, ჟესტიკულაციით წარმოაჩინეს.

  „ია ია მინდვრის დედოფალი,“ საბავშვო თეატრის „ზღაპრის სამყაროს“ განახლების შემდეგ, მეოთხე სპექტაკლია. წარმოდგენის განმეორებითი ჩვენება ხვალ, 19 აპრილს, საჯარო სკოლების დაწყებითი კლასების მოსწავლეთა და სკოლამდელი აღზრდის დაწესებულებათა აღსაზრდელთათვის გაიმართება.

  პრემიერას სასახლის დირექციასთან ერთად, ესწრებოდნენ: ტყიბულის მუნიციპალიტეტის საკრებულოს თავმჯდომარე, ნატალია კობახიძე და სხვადასხვა ორგანიზაციათა ხელმძღვანელები და წარმომადგენლები, პედაგოგები, მოსწავლეები და მათი მშობლები.

მარი ბაბუხადია