მოსწავლეთა სასახლის საახალწლო კონცერტი

31.12.2022

ტყიბულის შოთა რუსთაველის სახელობის მოსწავლე-ახალგაზრდობის სასახლეში საახალწლო კონცერტი, „თეთრი ციდან ფიფქი ცვივა,“ გაიმართა. მასში მონაწილეობას სასახლის მხატვრული კოლექტივების აღსაზრდელები იღებდნენ: ბავშვთა გაერთიანება „ბასტი-ბუბუ“ (ხელმძღვანელი მარინა ციცქიშვილი), ნორჩ ვოკალისტთა ჯგუფი „ნატვრისთვალი“ (ხელმძღვანელი ნათია გოქაძე) და მხატვრული კითხვის წრე (ხელმძღვანელები ნარგიზ ხიშტოვანი და მადონა ესებუა). საათზე მეტი ხანგრძლივობის პროგრამა სადღესასწაულო თემატიკის სიმღერებით, ლექსებითა და ქორეოგრაფიული ნომრებით იყო დატვირთული. მოზარდებმა მხატვრული კომპოზიციებიც წარუდგინეს მაყურებელს. სცენაზე პატარებს თოვლის ბაბუა მიესალმა და ბედნიერი ახალი წლის შემობრძანება უსურვა მათ.

აღსანიშნავია, რომ წინასაახალწლო ღონისძიებათა ფარგლებში მოსწავლეთა სასახლეში კვირეული მიმდინარეობდა, რომელიც 19 დეკემბერს ბავშვთა გაერთიანება „ანა-ბანას“ (ხელმძღვანელი ელისო დონაძე) საშობაო სპექტაკლით, „პეპი ჩვენს ქალაქში,“ გაიხსნა. 23 დეკემბერს N6 საჯარო სკოლის 1-2 კლასელებისათვის გაიმართა თოჯინების საახალწლო სპექტაკლი „მეგობრები თოვლის ბაბუს გადასარჩენად,“ შემდეგ კი, საახალწლო ვიქტორინა-კონკურსი სექციის მიერ „მიმართულება ცოდნის სამყაროში“ (ხელმძღვანელი მარიტა ბრეგაძე). 28-ში შედგა უფროსკლასელთა გაცნობითი საახალწლო კაფე-საღამო „თოვლის ფიფქმა ფანჯარაზე მომიკაკუნა“ (ხელმძღვანელი ბელა გვენეტაძე). 30 დეკემბერს კი კვირეული სასახლის აღსაზრდელთა შემაჯამებელი კონცერტით დაგვირგვინდა.

ნათია მურუსიძე