ვაჟა აზარაშვილი ტყიბულის სცენაზე

  დედა-ენის დღისადმი მიძღვნილი ღონისძიებების ფარგლებში ტყიბულის მუნიციპალიტეტის თეატრში ქართველი კომპოზიტორის, საქართველოს სახალხო არტისტისა და ხელოვნების დამსახურებული მოღვაწის, ვაჟა აზარაშვილის, შემოქმედებითი საღამო გაიმართა. 83 წლის მუსიკოსი ტყიბულელი აუდიტორიის წინაშე მეგობრებთან, მომღერალ ზურაბ კობეშავიძესა და სახელმწიფო ფილარმონიის გენერალურ დირექტორთან, ლადო ხელაშვილთან, ერთად წარდგა. მან საკუთარი ნამოღვაწარიდან, მხოლოდ პოპულარული საესტრადო სიმღერების ავტორისეული ვერსიები შესთავაზა მსმენელს - „ისევ წვიმს,“ „დღეები მიდიან,“ პატარა გოგო,“ „სიმღერაა მთელი ჩემი ქონება,“ „დინამო, დინამო“ და სხვა მრავალი.

  აღსანიშნავია, რომ ვაჟა აზარაშვილის შემოქმედება ჟარობრივი მრავალფეროვნებითაა გამორჩეული: სიმფონიური, კამერულ-ინსტრუმენტული, მიუზიკლებისა და კინოფილმებისათვის შექმნილი თუ საესტრადო მუსიკა. რაც შეეხება ამ უკანასკნელს, ქართული კლასიკური პოეზიიდან კომპოზიტორი ხშირად მიმართავს ნიკოლოზ ბარათაშვილის ქმნილებებს, ხოლო თანამედროვე პოეტებიდან, ძირითადად ინსპირაციის წყაროდ, მორის ფოცხიშვილისა და პეტრე გრუზინსკის ლექსებს იყენებს. აღსანიშნავია, რომ მას არაერთი სიმღერა აქვს მიძღვნილი დედაქალაქისადმი. 1999 წელს კი მას თბილისის საპატიო მოქალაქის ტიტულიც მიენიჭა.

  ვაჟა აზარაშვილის საღამო ტყიბულის მუნიციპალიტეტის თვითმმართველობის ფინანსური მხარდაჭერითა და მერიის განათლების, კულტურის, სპორტის, ახალგაზრდობისა და ტურიზმის განვითარების სამსახურის ორგანიზებით ჩატარდა, სადაც დასწრება თავისუფალი იყო.

  კონცერტის დასასრულს კომპოზიტორმა ტყიბულის მაყვალა ქასრაშვილის სახელობის ხელოვნების სკოლას საკუთარი ნაწარმოებების სანოტო ვერსიები საჩუქრად გადასცა.

ნათია მურუსიძე

32 thoughts on “ვაჟა აზარაშვილი ტყიბულის სცენაზე”

Добавить комментарий

Ваш адрес email не будет опубликован.